Das Meehrche vum Rotkäppche

Domols imme Land gabs emol a Fraa die hot a Dochter. Des Medsche hat so immer en rot Käppche getrah uff’m Kopp. Deshalb hieß des Medche aach Rotkäppche. Dem Medche sei Oma war ziemlich krank. Do hot die Mutter en Freßkorb gemacht und des Rotkäppche dode mit zur Oma geschickt.

Bevor des Medche losgang is, seeht die Mutter

„Horsch, geh nit vum Weesch ab. Dass is zu gefährlich.“

Die Oma wohnt neemlich mitte im Wald. Uff’m Weg dohie sieht das Medche scheene Blumme in de Nee vum Weesch un denkt:

„Wie schee, die Oma deet sich bestimmt freie ibber so scheene Blumme. Do nemm isch a paar mit.“

Während sie noch am plicke is, kimmt de Wolf un seeht:

„Ei wer bischt’n Du, un was mach’sche dann do?“

„Ei, ich bin des Rotkäppche und die Blumme sinn vor mei Oma, die is nehmlich krank und ich bring ihr was zu esse.“

„Ei, wo wohnt dann dei Omasche?“, freeht de Wolf.

„Na, do hinne im Wald, in dem Haisje“ seeht des Rotkäppche. Plickt sei Blumme fertisch und geht weiter zur Oma.

Als’ses zur Oma kimmt, lieht die im Bett. Nur de Kopp guckt aus de Bettdeck raus. „Ei Omasche, was hosch’n heit vor große Aah?“

„Ei, damit ich besser gucke kann!“

„Unn warum hosch’n so ne groß Noos?“

„Damit ich besser rische kann!“

„Unn warum hosch’n so große Oohre?“

„Damit ich besser heehre kann!“

„Unn warum hosch’n so’n grooße Mund?“

„Damit ich Dich besser fresse kann!“

Seeht’s, hippt uff und verschlingt des Medche. Dodedruff is de Wolf so mied wor, dasser ingeschloof is. E zeitlang speeter kimmt e Jeescher vorbei und heehrt jemand schnarsche.

Als er ins Haus rinngieht, sieht er de Wolf unn sein dicke Bauch unn denkt:

Mensch, der hots Omasche gefress.

Er nimmt ne Scheer und schneid dem Wolf de Bauch uff. Unn heraus kimmt das Rotkäppche sammt de Oma.

Wie honn die sich gefreit, daß se widder aus dem Bauch drauße warn.

Schnell honn se Wacke geholt und dem Wolf in de Bauch gesteckt. Dann honn se de Bauch zugeneht. Als de Wolf wach wor is, hotter en riese Dorscht und muß was trinke.

Als er dann zum Brunne is, denkt der sich, was rumpelt un pumpelt dann so in meinem Bauch rum. Mer kennt grad meene es weern Wackestee. Dann hängt er sich ibber de Brunne um zu saufe. Wie er sich abber so dribberhängt, rutsche de Stee no vorne, un er krieht des Ibbergewicht, unn fellt koppibber in de Brunne un ersaift.

Mensch, honn do sich aber all gefrait und richtich gefeiert.

Unn wenn se nit gestorb sinn, dann lebe se noch heit.